Ek het al by verskeie plekke boerseep gekoop, en dié staan beslis uit. Ons het die vakansie gaan kamp en my twee rooimiertjies het hulself elke dag na 'n reënbui gate uit geniet in die rooi grond, en natuurlik is al my dogtertjie se klere in pastelskakerings. Was so dankbaar dat my skoonsussie 'n koekie(altans "koek") boerseep in my kerskous gegooi het, want wie dink nou daaraan om boerseep te pak as jy gaan kamp. Alles het sommer tjop-tjop skoongekom. Ek het selfs my seuntjie een aand gewas met die boerseep, want hy het al kleur begin verander van al die gejollery in die modder, gewone seep wou nie meer die ding doen nie, het nie eers nodig gehad om vreeslik te skrop nie, en my rooikop kind was weer wit.
